تاند (چهارشنبه د اسد ۱۳ مه ) په کابل کې د ملي دفاع وزارت د سرپرست بسم الله محمدي پر کورو وسله وال بريد دترهګرو په وژل کېدو سره پای ته رسيدلی دی.
د کورنيو چارو وزارت وايي، چې په دې پېښه کې اته تنه وژل شوي او تر شلو زيات نور ټپيان شوي دي.
تېره شپه شاواخوا اته بجې د کابل د لسمې حوزې په اړوند سيمه (شير پور) کې ترهګرو د ملي دفاع وزارت د سرپرست د کور مخې ته لومړی موټر بم بريدوکړ او وروسته څو تنه بريدګر د ښاغلي محمدي کور ته ننوتل او له امنيتي ځواکونو سره يې نښته پیل کړه.
امنيتي چارواکي وايي چې بريد ۷ ترهګرو کړی و، چې ټول د افغان امنيتي ځواکونو له لوري وژل شوي دي.
د ملي دفاع وزارت سرپرست ويلي، چې په بريد کې ده او کورنۍ ته يې زيان نه دی رسيدلی.
بل خوا د ولسي جرګې غړی محمد عظيم محسني وايي،چې په دغه بريد کې د نوموړي څلور مراجعين وژل شوي او شپږ نور ټپيان دي.
پېښه په داسې سيمه کې شوې ده چې تر ډيره پکې د دولتي چارواکو کورونه دي او د پېښې په ځای کې ليدل کيږي،چې ځينو نورو کورونو ته هم سخت زيان اوښتی او د ډېرو کورونو ښیښې ماتې شوې دي.
امنيتي چارواکي وايي چې د پېښې په هکله د دوی څېړنې روانې دي او د څېړنو تر بشپړېدو وروسته به له رسنيو سره جزيات شريک کړي.
ددغه بريد مسوليت تر اوسه کومې ډلې پرغاړه نه دی اخيستی، طالبان هم چې تر دې وړاندې يې د دا وړ پېښو په تړاو ډير ژر غبرګون ښوده او د پېښې مسووليت يې پر غاړه اخیسته او يايې خپل لاس لرل پکې ردول،تر اوسه چوپه خوله دي.