تاند (پنجشنبه د اسد ۷) چين هيله څرګندوي چې طالبان د ختيځ ترکستان د اسلامي غورځنګ پر وړاندې وجنګېږي.د چين د بهرنيو چارو وزارت وياند ژائو لیجیان وايي چې هيله لري طالبان د ختيځ ترکستان د اسلامي غورځنګ په ګډون د ټولو ترهګرو ډلو پر وړاندې کرښې معلومې کړي او د هغوی پر وړاندې په پرېکنده او اغېزناکه توګه چلند وکړي.
نوموړي زياته کړې چې د ختيځ ترکستان د اسلامي غورځنګ پر وړاندې مقابله د نړېوالې ټولنې ګډ مسووليت دی، خو زياته کړې يې ده چې هيله يې داده چې طالبان د دغه غورځنګ پر وړاندې په پرېکنده چلند سره د سيمه ييز امنيت، ټيکاو او پراختيا لپاره شرايط برابر کړي.
چين له افغانستانه دامريکا او ناټو ځواکونو په بېړه وتل دافغانستان په تړاو د امريکا د سياست د ناکامۍ نښته بولي خو زياتوي چې د افغانستان خلک لاهم د خپل هېواد د پرمختګ او د اقتصاد د غوړاوي لپاره فرصت لري.
چين په داسې حال کې د خپلې يوې مخالفې ډلې پر وړاندې د طالبانو د جنګېدو غوښتنه کوي چې دوه ورځې دملابرادر په مشرۍ د دې ډلې يوه پلاوي چين ته سفر درلود. په دوحه کې د طالبانو د سياسي دفتر د وياند ډاکټر نعيم په وينا د دغه سفر پر مهال دغه طالب پلاوي له چين نه غوښتي چې د افغانستان په چارو کې لاسوهنه ونه کړي او د افغانستان له خاورې يې دغه هېواد ته د ګواښ نه پېښېدو ډاډ ورکړی دی.
بل خوا چين ويلي دي چې دغه هېواد ته يې د طالبانو د دغه پلاوي له سفر مخکې له افغان حکومت سره همغږي کړې وه او افغان حکومت دغه هېواد ته د طالبانو پر سفر خبر و.