تاند (پنجشنبه د سرطان ۲۳) چین وایي په افغانستان کې د دایمي سولې او ثبات غوښتونکی دی.
د افغانستان د بهرنیو چارو وزارت وايي، دغه خبره د چین د بهرنیو چارو وزیر وانګ یې له خپل افغان سیال، حنیف اتمر سره د شانګهای د همکاریو سازمان په چوکاټ کې د افغانستان د اړیکو ډلې د څلورمې ناستې په څنډه کې وکړه.
د دغه وزارت په بیان کې راغلي چې په دې لیدنه کې دواړو لوریو په دوه اړخیزو اړیکو، د افغانستان په سیاسي او امنیتي وضعیت، افغان سولې پروسې او یو شمېر نورو مسایلو خبرې وکړې.
د بیان له مخې د چین د بهرنیو چارو وزیر وویل، دوی د افغان سولې کلک ملاتړي دي او هڅه کوي افغانستان ته د دایمي سولې د راتګ په برخه کې خپلې همکارۍ ډېرې کړي.
د ښاغلي وانګ یې په خبره دا د طالبانو لپاره ستره ازموینه ده چې په سیاسي بهیر کې د ګډېدو لپاره جګړې ودروي، له ترهګرو ډلو سره اړیکې پرې کړي او په افغانستان کې روانه جګړه د تل لپاره ختمه کړي.
د افغانستان د بهرنیو چارو وزارت وايي ښاغلي اتمر هم د خبرو له لارې د افغان جګړه پر پای ته رسېدو ټینګار وکړ او په دې برخه کې یې د سیمې د هېوادنو رول مهم وباله.