تاند ( دوشنبه، د سرطان ۱۴) د پاکستان او وېسټ انډيز ښځینه ملي لوبډلو ترمنځ ۳ مه شل اوره لوبه ویسټ انډيز په ۶ وېکټو وګټله.
پاکستانۍ لوبډلې د لوبې پچه وګټله او لومړی یې توپ وهنه وکړه.
یادې لوبډلې په ټاکلو شلو اورونو کې د ټولو لوبغاړو په سوځېدو ۱۰۲ منډې وکړې او وېسټ انډیز ته یې د ۱۰۳ منډو هدف ورکړ.
پاکستان لپاره تر ټولو ډېرې ۲۹ منډې عالیه ریاض وکړې او وېسټ انډیز لپاره بیا لوبډلمشرې سټیفانو ټایلر ۴ لوبغاړي وسوځول.
وېسټ انډيز ښځینه لوبډلې ټاکل شوی هدف په شلم اور کې د ۴ لوبغاړو په زیان پوره او لوبه یې د ۶ لوبغاړو په شتون کې وګټله.
وېسټ انډیز ته لوبډلمشرې د ښې توپ اچونې تر څنګ په زړه پورې ۴۳ منډې هم وکړې او د لوبې غوره لوبغاړې شوه.