تاند ( یک شنبه، د سرطان ۱۳) په کاناډا کې د سختې ګرمۍ له امله ځینو سیمو اور اخیستی دی.
د کاناډا حکومت وایي، دمګړی د بېلابېلو ولایتونو په ۱۳۰ سیمو کې اور لګېدلی او د اور وژنې ډلې هڅه کوي اور مهار کړي.
سرچینه وایي، چې کاناډايي پوځ هم د دغه اور د مهارولو په لټه کې دی.
چارواکي وایي، چې اور په ځینو برخو کې پوره ښارونه له خطر سره مخ کړي او په ځينو سیمو کې یې پوره کلي سوځولي دي.
د دوی په وینا اور تر ډېره په ځنګلي سیمو کې رامنځته کېږي.
دا په داسې حال کې ده، چې په کاناډا کې د حرارت درجه لوړه شوې ده، چې له امله یې د اور تر څنګ لسګونه کسان وژلي هم دي.
کاناډايي حکومت پر خلکو له یو بل سره د مرستې او همکارۍ غږ کړی دی.