تاند ( چهارشنبه، د سرطان ۹ ) د افغانستان د کرکټ بورډ مشر فرهان یوسفزي نن د یوه خبري کنفرانس پرمهال وویل، د افغانستان غوره لیګ یا آې پي اېل دوهم پړاو لوبې به د راتلونکي ۲۰۲۲م کال په فبرورۍ میاشت کې ترسره شي.
یوسفزي زیاته کړه، چې د سنکسر په نوم له کمپنۍ څخه يې د تېر پړاو قضیه په نړيواله محکمه کې ګټلې او د دغه ليګ پر وړاندې خنډونه يې له منځه وړي دي.
يوسفزي د دغې ادارې د بوديجي په اړه اندېښنې بې ځایه وبللې او زیاته یې کړه، چې بودیجه به یې د کرکټ نړيواله شورا په راتلونکي ناسته کې ۶۰ سلنه زیاته کړي.
فرهان یوسفزي پر کرکټ د کورونا اغیزو ته په اشارې وویل: «مونږ پلان درلود چې د روان کال جولای میاشت کې د شپږیزه کرکټ لیګ اتم پړاو ترسره کړو؛ مګر د کورونا د دریمې څپې په راتګ سره د کال اخر ته وځنډېد او د عامې روغتیا وزارت سره په همغږۍ به د شپږیزې اتم پړاو ترسره کړو».
هغه زیاته کړه، چې ملي لوبډلې ته د شل اوريزه سياليو لپاره به راتلونکو دوو اونيو کې لوبډلمشر وټاکل شي.
ټاکل شوې چې په سپتمبر مياشت کې د کرکټ شل اوره نړيوال جام ترسره شي، خو افغان کرکټ بورډ د ملي لوبډلې لپاره تر اوسه لوبډلمشر نه دی ټاکلی.