تاند ( دوشنبه، د سرطان ۷) سویلي افریقا په دوهمه نړیواله شل اوریزه لوبه کې له ویسټ انډیزۍ لوبډلې د لومړۍ لوبې بدل واخیست.
د لوبې په پیل کې وېسټ انډیز پچه وګټله او لومړی یې سویلي افریقا ته د توپ وهنې بلنه ورکړه.
سویلي افریقا په ټاکلو ۲۰ اورونو کې د ۷ لوبغاړو په سوځېدو ۱۶۶ منډې وکړې.
د ۱۶۷ منډو هدف په تعقیب د وېسټ انډیز لوبډلې په ټاکلو ۲۰ اورونو کې د ۹ لوبغاړو په سوځېدو ۱۵۰ منډې وکړې او د ۱۶ منډو په توپیر یې په لوبه کې ماتې وخوړه.
د ۵ نړیوالو شل اوریزو لوبو لړۍ اوس د ۱-۱ سره برابره شوه.
له دې وړاندې لومړۍ لوبه وېسټ انديز لوبډلې ګټلې وه او درېیمه لوبه یې د جون په ۲۹مه نېټه په سینټ جارج کې ترسره کېږي.