تاند ( شنبه، د سرطان ۵) د امریکا د بهرنیو چارو وزیر په یوه خبري کنفرانس کې د خبرو پر مهال ویلي، دوی غواړي ډاډه شي چې طالبان په رښتیا د سولې غوښتونکي دي کنه.
انتونیو بلېنکن ویلي، طالبانو دمګړی جګړې ته زور ورکړی چې د جګړو دا شدت د سولې له خبرو سره همغږی نه دی.
هغه ټینګار کړی چې په افغانستان کې هېڅ لوری هم د زور له لارې واک ته نه شي رسېدلی او نه هم امریکا د دې ملاتړې ده چې په افغانستان کې دې جګړه او تاوتریخوالی دوام وکړي.
د امریکا د بهرنیو چارو وزیر وایي، چې دوی به هېڅ لوری په خپله خوښه او د زور له لارې پرې نږدي چې واک ته ورسېږي.
ولسمشر غني د طالبانو په وړاندې د افغان ځواکونو پر وړتیا ډاد څرګند کړ
بلېنکن داسې مهال دا څرګندونې کوي، چې تازه افغان ولسمشر محمد اشرف غنی د امریکا د استازو جرګې له مشرې نانسي پلوسي سره د لیدنې پرمهال ، د طالبانو بریدونه ظالمانه وبلل او زیاته یې کړه ، چې افغانستان کې د انتقال بهیر پیل شوی او هغه به پرې له امریکایي چارواکو سره په جزیاتو وغږیږي.
له دې لیدنې وروسته د امریکا ولسمشر جو بایدنه هم ورته د هر اړخیز ملاتړ ډاډ ورکړی دی.
بایډن ټینګار کړی چې د افغانانو تر څنګ به ولاړ وي او سفارت به یې پخوا په څېر په دې هېواد کې پاتې شي.
هغه په افغانستان کې د تاوتریخوالي پر ختمیدو ټینګار کړی او هیله یې څرګنده کړې چې افغانان به خپلو کې سره سوله وکړي.
د اشرف غني او جو بایډن کتنه؛ بایډن: امریکا د افغانانو ترڅنګ ولاړه ده خپلې پرېکړې دې خپله وکړي