تاند ( پنجشنبه، د سرطان ۳ مه) هندي رسنۍ وایي، د بالیووډ سینما مخکښ اداکار ریتیک روشن د کرش فلمونو چې درې یې نندارې ته وړاندې کړي او خلکو ډېر خوښ کړې دي، د څلورمې برخې د جوړېدو اعلان وکړ.
دا د هندوستان د سوپر هیرو فلمونو تر ټولو مشهوره لړۍ ده.
کرش فلمونه نه یوازې د ریتیک روشن د مشهورو فلمونو څخه دي، بلکې دا د ایکشن او سوپر هیرو په برخه کې هم د هند مشهور فلمونه دي.
ریتیک روشن د دې لړۍ د لومړي فلم د ۱۵ کلونو په پوره کېدو په ټولنیزو رسنیو کې یوه کوچنۍ ویډیو خپره کړې او ورسره یې د کرش ۴ فلم د جوړېدو اعلان کړې دی.
هغه له دې ویډیو سره لیکلي چې پخوا اوس تېر شوی، اوس به ګورو چې کرش ۴ ستاسې لپاره څه راوړي.
په ټولنیزو رسنیو کې د ریتیک روشن مینه والو هم د دې فلم لیدو ته ډېره لېوالتیا ښکاره کړې ده.
د یادولو وړ ده چې کرش ۳ فلم په ۲۰۱۳ کال کې نندارې ته وړاندې شوی و.
په دې فلم کې له ریتیک روشن سره کنګنا رناوت، پریانکا چوپړا او ویویک اوبرای کار کړی و.
دغه فلم په ۹۵ کروړه روپۍ جوړ شوی و او ۳۹۳ کروړه روپۍ یې ګټلې وې.