تاند- په جرمني کې لومړني جوړ شوي هوايي ټکسي ۵۰۰ متره ازمېښتي الوت وکړ.
د رویټرز خبري اژانس د راپور له مخې، د جرمني د ولوکوپتر کمپنۍ هوايي ټکسي د دوشنبې په ورځ (جون ۲۱) د فرانسې په اسمان کې والوت.
دا ټکسي، چې د فرانسې په یوه نندارتون کې یې ازمېښتي الوت وکړ، په پام کې ده د پاریس د ۲۰۲۴ په المپیک سیالیو کې عملاً سپرلۍ له یوه لوبغالي بل ته ورسوي.
دا ټکسي یوې کوچنۍ څرخکې (هیلي کوپتر) ته ورته دی.
دغه ټکسي پاریس ته نژدې له لوبورژې هوايي ډګره الوت پیل کړ او له ۳ دقیقو وروسته په عمودي ډول پر مځکه کښېناست.
د دې ازمېښتي الوت یا ټیست په لړ کې په الوتکه کې څوک سپاره نه و، او ټکسي په داسې حال کې چې سرعت یې په ساعت کې ۳۰ کیلومتره او لوړوالی ۳۰ متره و، نیم کیلومتر والوت.
دا هوايي ټکسي ۲ تنه سپرلۍ بیولی شي.