تاند (سه شنبه، د سرطان ۱) د پاکستان سوپر لیګ ایلیمینېټر ۱ لوبه د کراچۍ کېنګز او پېښور زلمي لوبډلو ترمنځ ترسره شوه.
پچه پېښور زلمي وګټله او لومړی یې کراچۍ کېنګز ته د توپ وهنې بلنه ورکړه.
کراچۍ کنګز په ټاکلو ۲۰ اورونو کې د ۷ لوبغاړو په سوځېدو ۱۷۵ منډې وکړې.
بابر اعظم ۵۳، تیسارا پریرا ۳۷ تر نورو ډېرې منډې وکړې.
پېښور زلمي لپاره بیا وهاب ریاض، محمد عرفان او اصف ۲-۲ لوبغاړي وسوځول.
د پېښور زلمي لوبډلې په ۲۰ ام اور کې د ۵ لوبغاړو په سوځېدو ټاکل شوی هدف پوره کړ او د ۵ ویکټو په شتون کې بریا خپله کړه.
د دوی لپاره افغان لوبغاړي حضرت الله ځاځي د ۵ شپږیزو او ۱۰ څلوریزو پر مټ په ۳۸ توپونو ۷۷ چټکې منډې وکړې.
کراچۍ لپاره بیا پرېرا ۲، نور احمد لکڼوال، محمد الیاس او محمد عامر ۱-۱ لوبغاړي وسوځول.
حضرت الله ځاځی د لوبې غوره لوبغاړی شو.
د یادونې ده چې ځاځي د پاکستان په سوداګریز کې کې تر دې دمه ۳ لوبې کړي او دوه ځلې غوره لوبغاړی ټاکل شوی دی.
پېښور زلمي، کراچۍ ته په ماتې ورکولو سره ایلیمینېټر ۲ لوبې ته لار پېدا کړه.
دوی به د اسلام اباد یونایټیډ سره ولوبېږي او که یې اسلام اباد ته ماتې ورکړه، نو پایلوبې ته به لاړه شي.