تاند(سې شنبه، د جوزا ۲۵) د ناټو مشرانو د بروکسل په سرمشریزه کې اعلان وکړ چې له افغانستانه د دوی د ځواکونو وتل دا معنا نه لري چې افغانستان ته به شا اړوي، بلکې دا د همکاریو نوې پیلامه ده.
دوی د افغانستا ن د تېرو ۲۰ کلونو د بریاوو پر خوندیتوب ټینګار وکړ او یو وار بیا یې د افغان امنیتي او دفاعي ځواکونو د ملاتړ د دوام ژمنه وکړه.
د ناټو د مشرانو په اعلامیه کې دغه راز ویل شوي چې له افغانستانه د ټولو ځواکونو له ایستلو وروسته به خپل سفارتونه، ځانګړي ملکي دفترونه وساتي او له افغانستان سره به دیپلوماتیکې اړیکې لا ښې کړي.
دوی د کابل د حامد کرزي نړیوال هوايي ډګر د فعال ساتلو لپاره د مالي مرستې د دوام په اړه موافقه وکړه او دا هوايي ډګر یې د دیپلوماتیکو حضور لپاره ضروري وباله.
د امریکا ولسمشر جو بایډن د غونډې په پای کې خبریالانو ته وویل چې ټولو خواوو موافقه وکړه چې له افغانانو سره به بشردوستانه، اقتصادي او دیپلوماتیکو ژمنو ته دوام ورکوي.
ده همداراز وویل چې د ناټو غړیو سلا کړې چې د افغان امنیتي او دفاعي ځواکونو ننګه به جاري ساتي.
د ناټو سرمنشي ینس ستولتنبرګ بیا وویل، د ځواکونو له ایستلو وروسته به له افغانستان سره د ناټو همکارۍ په درو برخو متمرکزې وي: د افغان ځواکونو مالي ملاتړ، په بهر کې د افغان امنیتي ځواکونو روزل، پر له پسې ملکي حضور او د کابل د هوايي ډګر په شان د مهمو تاسیساتو ساتنه چې په افغانستان کې د نړیوالې ټولنې دوامدار حضور تضمین شي.
سرمنشي د دې پوښتنې په ځواب کې چې ایا په افغانستان کې د جګړې له زیاتېدو او د وینې تویېدو له دوام سره سره د پوځیانو د وتلو په پرېکړې شخصاً پښېمانه نه دی؟ وویل: «پاتې کېدل یوه بدیله لار او یو انتخاب و، خو د لا زیات تاوتریخوالي او لا زیاتې مرګژوبلې خطر یې درلود او ان د ناټو د سرتېرو د شمېر زیاتوالی. ځکه لکه څنګه چې ما وویل موږ له یو لکو عسکرو څخه د خپلو ځ واکونو شمېر ۱۰ زرو ته کم کړ. ټول پلان دا و چې افغانان (افغان امنیتي او دفاعي ځواکونه) د دې جوګه شي چې خپل امنیت وساتي.»
ینس سټولټنبرګ یادونه وکړه چې شاوخوا درې لکه افغان پوځیان اوس په ښه توګه د امنیت د ساتلو جوګه ګرځېدلي.
د کابل د هوايي ډګر په اړه د دوشنبې په ورځ ناوخته د امریکا او ترکیې ولسمشرانو په بروکسل کې د ناټو د سرمشریزې ترڅنګ یو په یو خبرې وکړې.
له کتنې وروسته د ترکیې ولسمشر رجب طیب اردوغان وویل، له افغانستانه د امریکا په مشرۍ د نړیوالو ځواکونو له وتلو وروسته د کابل د نړیوال هوايي ډګر د امنیت مسوولیت تورک (تُرک) ځواکونو ته سپارل کېږي.
ولسمشر اردوغان د افغانستان ثبات ته د طالبانو د ګواښ دوام تایید کړ خو ویې ویل چې تورکیه (ترکیه) له دې ډلې سره خبرې کولی شي.
ده وویل«که ترکیه ونه غواړي چې له افغانستانه ووځي او که د امریکا د متحدو ایالتونو له لوري دیپلوماتیک، لوژیستیکي او مالي ملاتړ وي، دا به زموږ لپاره ډېر مهم وي.موږ له طالبانو سره خبرو ته دوام ورکولی شو.»