تاند(شنبه، د جوزا ۲۲) کانګریس افغان ترجمانانو او نورو هغو افغانانو ته د امریکا د وېزو د ورکړې پرېکړه وکړه چې په تېرو ۲۰ کلونو کې یې له امریکایانو سره کار کړی دی خو په افغانستان کې دننه د کورونا وبا د چټکې خپرېدا له کبله د امریکا د سفارت کونسلي څانګه، چې وېزې صادروي، بنده شوه.
د پنجشنبې په ورځ د امریکا په سنا جرګه کې د دواړو ګوندونو د سناتورانو یوې ډلې د هغه پروګرام د ښه کېدو غوښتنه وکړه چې پر اساس یې هغه کسان امریکا ته بلل کېږي چې په افغانستان کې یې له امریکایانو سره مرسته کړې ده.
د دوی له لوري د وړاندې شوې لایحې په مسوده کې ویل شوي چې تر ۲۰ زره پورې هغو افغانانو ته دې د امریکا وېزې ورکړل شي چې په تېرو ۲۰ کلونو کې یې له امریکایانو سره د ترجمانانو په توګه یا په نورو برخو کې همکاري کړې ده.
خو د کانګریس د سنا جرګې د غړیو له دې پرېکړې وروسته په کابل کې د امریکا سفارت اعلان وکړ چې په افغانستان کې د کورونا وبا د پېښو د زیاتېدو له کبله په دې هیواد کې د وېزې د ورکولو ټول خدمات دروي.
د امریکا د سفارت له اعلان سره سم، سر له سبا (یکشنبې/ د جوزا ۲۳) د امریکا د سفارت او کونسلګریو کونسلي برخې بندېږي.
دې ته ورته پرېکړه په افغانستان کې د پاکستان سفارت هم کړې ده.