تاند ( جمعه، د جوزا ۲۱) د امریکا د دفاع وزیر لوید اسټين وایي، د خلیج په حوزه کې د امریکایي اډو په مرسته افغانستان کې د څارنې او جنګي ماموریت له پخوا څخه پیل شوی دی.
نوموړي د امریکا د سنا د وسله والو ځواکونو د خدماتو کمېټې په استماعیه غونډه کې دا خبرې وکړې.
لویډ اسټین په دې غونډه کې دې پوښتنې ته د مشخصو جزییاتو له وړاندې کولو ډډه وکړه، چې د افغانستان څخه د بهرنیو ځواکونو د وتلو وروسته د طالبانو په واسطه د کابل او یا د افغانستان د نورو سترو ښارونو د سقوط په صورت کې ایا امریکا افغان ځواکونو ته هوایي ملاتړ برابروي او که نه.
د امریکا د دفاع وزیر امریکایي قانون جوړونکو ته وویل، چې د افغانستان څخه په بشپړه توګه د بهرنیو ځواکونو له وتلو وروسته د افغانستان امنیتي او دفاعي ځواکونو ته د هوایي ملاتړ برابرول به ډېر ستونزمن وي.
هغه وویل اوس امریکایي پوځیان د هوایي ګزمو او نظارتي ماموریت لپاره کشفي الوتکې د فارس په خلیج کې د الوتکه لیږدونکو کښتیو او د خلیج د هیوادونو څخه افغانستان ته لیږي.
امریکا داسې مهال دا څرګندونې کوی، چې تېره ورځ ناټو ویلي وو، چې د بهرنیو ځواکونو تر وتلو وروسته له افغان پوځ سره د همکاریو نوی باب پرانیزي.
دا خبره تېره ورځ په افغانستان کې د ناټو ملکي استازي سټېفانو پانتیکورو د ملي امنیت شورا له سلاکار حمدالله محب سره په کتنه کې کړې ده.
د ناټو ملکي استازي ویلي دوی له افغان حکومت او افغان ځواکونو سره همکارۍ ته ژمن دي، خو د بهرنیو ځواکونو تر وتلو وروسته به د همکارۍ نوی باب پرانیستل شي.
ناټو له دې وړاندې هم ویلي چې له افغان پوځ سره همکارۍ ته ادامه ورکوي او هڅه کوي د ترهګرۍ ضد مبارزه کې د دوی لاسنیوی وکړي.
زه باور نلرم ، چې امریکا به د افغانستان دولت سره مخلصانه او څنګه چې وعدې کوي، په خپلې وینا عمل وکړي، امریکا د افغان دولت او ملي ځواک په وړاندې د اعتبار ځواک بایللی دی.
اوس افغان ملي پوځ او افغان دولت ته پکار دي، چې د هند، روس او له نورو هیوادونو څخه وسلې وپلوري.
افغان دولت ته پکار دي، چې خپلو نړیوالو دوستانو سره دفاعي او امنیتي تړونونه رامنځ ته کړي، تر څو د افغانستان یو ځل بیا د نړیوال تروریزم په مرکز او قرارګاه بدل نشي، او د یو راتلونکي بشري ناورین څخه افغانان وژغوري.
طالبان به هیڅکله هم واک ته ونه رسیږي، بلکې دوی به د یوې بلې کورنۍ جګړې سره مخامخ شي، چرته چې به عام ولسونه هم دوی سره لاس په لاس جنګ وکړي، هغه قرباني چې افغان ملي پوځ د خپل هیواد د ساتنې لپاره وړاندې کړې ده، هغه بې سارې ده، دلته په هر کور کې هرې مور یو زوی د هیواد لپاره قرباني کړی دی.
د افغانستان دښمنان به هیڅکله د پردیو لپاره خپل منزل ته ونه رسیږي، سوله د ټولو غوښتنه ده، او د دې لارې ځواک ته رسیدل شونې دی. سوله یوه عملي، عقلي او روا لار ده.