تاند( دوشنبه، د جوزا ۱۷) د پکتیا والي محمد حلیم فدایي وایي، افغان ځواکونو د دې ولایت په احمدابا، مېرزاکه او زرمت ولسوالیو کې په وسله والو طالبانو هوایي بریدونه کړي.
نوموړي دا خبرې نن له غرمې وړاندې رسنیو ته کړي.
د هغه په خبره په دې بریدونو کې ۵۰ وسله وال طالبان وژل شوي او ګڼ نور ټپیان شوي دي.
نوموړی وایي په وژل شویو طالبانو کې ۱۲ د احمدابا ولسوالۍ په جان غر، ۲۸ طالبان د مېرزاکې ولسوالۍ په کړکین خوله او ۱۰ نور د زرمت ولسوالۍ په زرګر ګودر سیمه کې وژل شوي دي.
والي حلیم فدایي زیاتوي، په وژل شویو طالبانو کې ګڼ بهرني جنګیالي هم شامل دي، خو وایي د هویت او شمېر په اړه یې کره معلومات نه لري.
د پکتیا والي وایي، په دې بریدونو کې د طالبانو یو شمېر درنې او سپکې وسلې هم له منځه وړل شوي او دغه راز ۵ ولسي پاڅونوال اوس هم لا درکه دي.
بل لورته بیا د وسله والو طالبانو ویاند ذبیح الله مجاهد دوی ته اوښتې مرګ ژوبله او د دوی په لیکو کې د بهرنیو وسله والو موجودیت نه مني.
ذبیح الله مجاهد وایي، د مېرزاکې ولسوالۍ په نښته کې یې ۳ تنه وژل شوي، خو زیاتوي د افغان سرتېرو یوه پوسته یې نیولې او ۳۵ سرتیري یې وژلي دي.