تاند ( یکشنبه، د جوزا ۱۶ مه) راپورونه وایي، د ملګرو ملتونو یوه پلاوي په دوحه کې د افغان حکومت او طالبانو له مرکچي پلاویو سره ناسته کړې ده.
په کابل کې د ملګرو ملتونو د مرستندویه دفتر یا یونما څخه په خپره شوې خبرپاڼه کې راغلي چې د یونما مشرې دیبورا لاینز په دوحه کې د طالبانو او افغان حکومت له مذاکراتي پلاوو سره کتلي دي.
خبرپاڼه وایي، په دې لیدنه کې د سولې پر روانه پروسه او د تاوتریخوالي پر کمولو خبرې شوې دي.
سرچینې زیاته کړې چې اغلې لاینز په دې ناسته کې ویلي چې په جګړه کې د ملکي وګړو مرګ ژوبله اوج ته رسېدلې ده او ددې جدي اړتیا ده چې روان تاوتریخوالی باید کم کړل شي.
د یوناما په خبرپاڼه کې همدا راز ویل شوي چې نوموړې له طالبانو سره د ملګرو ملتونو د ماموریت او کارکوونکو پر خوندیتوب هم خبرې کړې دي.
سرچینه کاږي یونما ژمنه تر لاسه کړې چې د ملګرو ملتونو کارکوونکي به خوندي وي او په ډاډه توګه کولی شي اړمنو افغانانو ته بشري مرستې ورسوي.
دا په داسې حال کې ده چې څو میاشتې وړاندې د کابل په سروبي ولسوالي کې د ملګرو ملتونو د ملکي کارکوونکو موټر د وسلوالو تر برید لاندې راغی او په ترڅ کې یې څو تنه کارکوونکي ووژل او ټپیان شول.