تاند – د افغانستان د ولسي جرګې رئیس میر رحمان رحماني نن د پيکو کنفرانس په څنډه کې له خپل پاکستاني سیال اسد قیصر سره لیدلي.
د ولسي جرګې د مطبوعاتي دفتر د معلوماتو له مخې، په دې لیدنه کې دواړو لوریو د سولې پروسه کې د پاکستان پر رول، د سوداګریزو اړیکو پر پراختیا، د سوداګرۍ پراختیا کې د پیکو کنفرانس پر رول او افغانانو ته د ویزو د ورکړې برخه کې د اسانتیاوو پر رامنځته کولو خبرې وکړې.
د خبرپاڼې له مخې، رحماني په دې ناسته کې په کابل کې د پيکو کنفرانس د بلې ناستې د ترسره کېدو وړاندیز کړی چې قیصر هم منلی ورسره منلی دی.
د اسد قیصر په خبره چې افغانستان د سوداګرۍ لپاره مناسب ځای او څلور لارې ده او د ګاونډي، سیمې او پیکو سازمان غړي هېوادونه کولای شي چې د افغان دولت سره په همغږۍ د اقتصادي ودې او پرمختګ لپاره ترې ګټه واخلي.
په بیان کې د میر رحمان رحماني له قوله راغلي چې پاکستان باید د افغان سولې پروسه کې ریښتیني همکاري وکړي. هغه له خپل پاکستاني سیال څخه غوښتي چې د پاکستان په حکومت فشار راوړي ترڅو وسله وال طالبان له افغان حکومت سره د سولې خبرو ته اړ کړي.
پیکو کنفرانس د تجارتي او اقتصادي راکړې ورکړې او مناسباتو د پیاوړتیا په موخه هر کال یو وار ترسره کېږي.
میر رحمان رحماني پرون یکشنبه د یو پلاوي په مشرۍ پاکستان ته تللی دی.