تاند(پنج شنبه، د جوزا ۶) د پاکستاني پارلمان او د پښتون ژغورنې غورځنګ مخکښ غړي محسن داوړ په شمالي وزیرستان کې د خړ کمر پېښې په یاد جوړې شوې پراخې غونډې ته په خبرو کې پر طالبانو توندې نیوکې کړې دي.
محسن داوړ له طالبانو پوښتلي دي چې که چېرته په رښتیا هم د اسلام لپاره کار کوي نو ودې وایي چې اسلام په افغانستان کې ډېر قایم دی او که په پاکستان کې.
نوموړي د خپلو خبرو پر دوام زیاته کړې، دا ډېره عجیبه ده چې طالبان په پاکستان کې جګړه ناروا ګڼي خو په افغانستان کې بیا خپلې جګړې ته د جهاد نوم ورکوي.
داوړ زیاته کړې، چې د طالبانو پر افغانیت شک لری، ځکه د ده په وینا، که طالبان افغانان وي نو بیا ولي د پاکستاني جنرالانو په وینا په افغانستان کي جګړه مخته وړي او افغانان وژني.
د یادونې ده چې تېره ورځ د پښتون ژغورنې غورځنګ مشر منظور پښتین یو ځل بیا د پښتنو پر وړاندې د پاکستان پر ظلمونو توندې نیوکې کړې دي.
نوموړي په شمالي وزیرستان دته خېل سیمه کې یوې پراخې ولسي غونډې ته په خپله وینا کې ویلي چې پاکستان له کلونو راهیسي د پښتنو پر وړاندې ظلمونه روان کړي دي خو هیچا یې هم پر وړاندې غږ نه دی پورته کړی.
پښتین د خپلو خبرو پر دوام ویلي چې دا غونډه یې د خړ کمر پېښې په یاد جوړه کړې ده او هدف یې دا دی چې یو ځل بیا د پاکستان شریرو استخباراتي ادارو ته ورپه یاد کړي چې دوی د خپل سر په بیه د خپل قوم او وطن ساتنه کوي.
د ویلو ده چې دوه کاله وړاندې په همدې ورځ د شمالي وزیرستان دته خېلو سیمې په خړ کمر کې د پاکستاني ځواکونو د ډزو له امله ۱۵ کسانو خپل ژوند وبایلل او ۲۵ نور ټپیان شول.