تاند – د کونړ د والي محمد اقبال سعید پر موټريز کاروان د جلال اباد ښار اړوند اتمه ناحیه کې چاودنه شوې.
د ننګرهار ولایتي چارواکي هم د پېښې پخلی کوي او وايي چې پر والي اقبال سعید نن مازدیګر شاوخوا پنځه بجې د جلال اباد ښار اتمې ناحیې اړوند شاه برهان اغا سیمه کې د سرک غاړې ماین چاودلی دی.
د ننګرهار د والي ویاند عطاءالله خوګیاڼي وايي، د کونړ والي له پېښې روغ وتلی خو د هغه دوه ساتونکي ټپیان شوي دي.
نوموړي زیاتوي، “متاسفانه د کونړ والي صيب په تعقيبي موټر د بهسودو شاه برهان اغا سيمه کې د سړک غاړې ماين چاودنه شوې چې خوشبختانه د سر زيان نلري.”
د یادونې ده چې نن سهار هم په یاده سیمه کې د کامې د ولسوال په موټر چسپکي ماین چاودلی و چې له امله یې د والسوال په ګډون درې تنه ټپیان شوي.
تر اوسه د دغو پېښو مسؤلیت کوم چا یا ډلې نه دی منلی.