تاند – د افغانستان د ملي دفاع وزارت د هېواد په بېلا بېلو برخو کې له افغان ځواکونو سره په نښتو او عملیاتو کې د څه باندې ۲۰۰ وسله والو طالبانو د مرګ ژوبلې خبر ورکوي.
د دفاع وزارت نن پنجشنبه/ د جوزا ۶مه/ په یوه خبرپاڼه کې ویلي، وسله والو طالبانو ته دغه مرګ ژوبله په تېرو ۲۴ ساعتونو کې اوښتې ده.
د خبرپاڼې له مخې، میدان وردک، غزني، لوګر، لغمان، زابل، کندهار، هلمند، هرات، بلخ، جوزجان، سمنګان او کندوز هغه ولایتونه دي، چې په کې له افغان ځواکونو سره د طالبانو نښتې شوې.
سرچینه وايي، په دغه نښتو کې ۱۵۲ وسله وال طالبان وژل شوي، ۵۵ ټپیان دي او ۳ تنه هم د امنیتي ځواکونو له خوا ژوندي نیول شوي دي.
د ملي دفاع وزارت د خپل لوري د مرګ ژوبلې په هکله یادونه نه ده کړې، خو وايي چې د طالبانو ۶۸ ماینونه یې هم شنډ او له منځه وړي دي.
طالبانو تر اوسه په دې هکله غبرګون نه دی ښودلی.