تاند(چهارشنبه، د ثور ۲۹) د امریکا د مرکزي قوماندانۍ یا سینټکام عمومي قوماندان جنرال فرانک مکینزي وايي، د جون په لومړیو کې به دفاع وزیر لویډ اسټن ته خپلې سپارښتنې وړاندې کړي چې له افغانستانه د امریکايي او ناټو ځواکونو له وتلو وروسته په دې هیواد کې د تروریستي ډلو پر ضد څرنګه جګړه وکړي او یا یې وڅاري.
جنرال میکنزي وویل، د افغانستان له ګاونډیو سره د اډو او له هغه ځایه په افغانستان کې د څارنې د عملیاتو لپاره د الوتنې په اړه خبرې روانې دي.
ده په عین حال کې وویل چې د افغانستان له ګاونډیو سره د اډو او د څارونکو عملیاتو په اړه خبرې وخت ته اړتیا لري.
جنرال مکینزي زیاته کړه، د امریکا متحد ایالتونو به د ترهګرو د ګواښونو د څارنې ترڅنګ د افغان امنیتي ځواکونو ملاتړ ته د دوو خواوو له امنیتي تړون سره سم دوام ورکړي.
ده دا وخت د افغان امنیتي ځواکونو لپاره د ازمېښت او خطر وخت وباله.
په منځني ختیځ کې د امریکايي ځواکونو (سینټکام) عمومي قوماندانو د اسوشیتید پریس خبري اژانس او اې بي سي نیوز له خبریالانو سره په خبرو کې په دې باب له څه ویلو ډډه وکړه چې د امریکا دفاع وزیر لویډ اسټن ته به د افغانستان په اړه څه سپارښتنې وکړي.
ده مخکې ویلي و چې که د افغانستان په ګاونډیو هیوادونو کې امریکا اډه ونه لري دا به ګرانه وي چې د عربي خلیج له هیوادونو څخه افغانستان وڅارل شي ځکه چې له قطر څخه تر افغانستان پورې بې پېلوټه الوتکه له ۴ تر ۶ ساعته وخت ته اړتیا لري.
د امریکا ولسمشر جو بایډن پرېکړه کړې چې ټول امریکايي پوځیان باید د سپټمبر تر ۱۱ پورې له افغانستانه ووځي.
امریکايي پوځیانو خپلې ګڼې اډې افغان ځواکونو ته سپارلي او د سلګونو الوتکو وسایل یې ایستلي دي.