تاند(سې شنبه، د ثور۲۸) د یوې تازه څېړنې له مخې، زموږ پر خاورینه کُره د مارغانو شمېر د انسانانو شپږ برابره زیات دی.
استرالیايي ساینسپوهانو په دې اړه په خپله څېړنه کې څرګنده کړې چې پر مځکه د مارغانو شمېر د ۵۰ ملیاردو او ۴۲۸ ملیاردو ترمنځ دی.
د استرالیا د سیډني د نیوساوت ویلز پوهنتون څېړنه، چې د مې په اوولسمه د امریکا د ساینس ملي اکاډیمۍ خپور کړی، ښيي چې تراوسه په مځکه کې ۹۷۰۰ ډوله مارغان پېژندل شوي دي.
څېړونکو له بېلابېلو طریقو څخه په کار اخیستو د مارغانو د شمېر په اړه اټکل کړی دی.
دا لومنړی ځل دی چې په نړۍ کې د مارغانو د شمېر د معلومولو هڅه شوې ده.
په دې څېړنه کې دا هم راغلي چې په مارغانو کې بیا تر ټولو ډېرې، کورنۍ خړې مرغۍ دي.
د دغو چوغکو شمېر یو ملیارد او ۶ لکه اټکل شوی دی. ورپسې اروپايي شامتوره یاده شوې او ویل شوي چې د شامتورو شمېر یو ملیارد او ۳۰۰ ملیونو ته رسېږي. د سمندري توتکیو (ring-billed gulls) شمېر یو ملیارد او ۲۰۰ ملیونه ښودل شوی دی.