تاند(شنبه، د ثور۲۵) د پاکستان د بهرنیو چارو وزیر شاه محمود قریشي د افغانستان له باندنیو چارو وزیر محمدحنیف اتمر سره په ټېلفوني خبرو کې د دایمي اوربند لپاره د هلو ځلو غوښتنه وکړه.
د پاکستان د بهرنیو چارو وزارت په یوه خبرپاڼه کې ویلي، قریشي خپل افغان ساري ته وویل چې اسلام اباد د اختر په درو ورځو کې د اوربند د اعلان هرکلی کوي خو پکار ده چې دواړه خواوې د دایمي اوربند هڅه وکړي.
ده همداراز ویلي چې د افغانانو ترمنځ خبرې د تلپاتې او ټولشموله موافقې لپاره تاریخي فرصت دی او د افغانستان څلوېښت کلنه جګړه پای ته رسولی شي.
د اتمر او قریشي له ټېلفوني خبرو سره په یو وخت پرون له اوږده ځنډه وروسته یو ځل بیا د بين الافغاني مذاکراتو د دواړو پلاویو ترمنځ په دوحه کې ناشته وشوه.
په قطر کې د طالبانو د دفتر ویندوی محمد نعیم وايي، په دغه ناسته کې د اختر مبارکي تر څنګ، د هېواد پر روان وضعيت او د بين الأفغاني مذاكراتو پر چټکتیا خبرې وشوې.
نوموړي همدا راز زیاته کړې چې دواړو لورو و پتیله چې له اختر وروسته به هم مذاکراتو ته دوام ور کوي.