تاند (سه شنبه د ثور ۱۴) د افغانستان د ملي دفاع وزارت په هلمند کې د القاعده شبکې د ۲۲ غړیو د وژل کېدو خبر ورکړ.
دغه وزارت نن سه شنبه/ د ثور ۱۴/ په یوه خبرپاڼه کې ویلي چې افغان ځواکونو په تېرو ۲۴ ساعتونو کې د هلمند ولایت په بېلابېلو سیمو کې د طالبانو پر ضد عملیات کړي دي چې په پایله کې د هند قارې لپاره د القاعده شبکې ۲۲ غړي وژل شوي دي.
د خبرپاڼې له مخې وژل شوي کسان اصلي د پاکستان د پنجاب ایالت اوسیدونکي و.
وسله والو طالبانو بیا تر دا مهاله په هلمند کې د القاعده شبکې د جنګیالیو د وژل کېدو په هکله څه نه دي ویلي، خو لښکرګاه ته نژدې د ځینو سیمو د نیولو ادعا یې کړې ده.
د یادونې ده چې په هلمند کې له تیرو څو ورځو راهیسې جګړې زیاتي شوي چې له امله زرګونه کورنۍ هم بېځایه شوي دي.