تاند ( پنجشنبه، د غویی ۹ ) د سویلي افریقا د کرکټ ملي لوبغاړي وین پرنېل د خپلې مېرمنې سره یو ځای خپل دین ( عیسویت) پرېښود او دواړه د اسلام په مبارک دین مشرف شول.
هغه ۲۶ کاله عمر لري او د افریقا دویم لوبغاړی شو چې د اسلام مبارک دین مني او مسلمانیږي.
نوموړي څو ورځې وړاندې له مېرمن میشک ایسن سره واده وکړ او له واده څو ساعته وروسته دواړه مسلمانان شول.
هغه د افریقا لپاره یوه یو ورځنۍ، ۷ شل اوریزې لوبې کړي او ۶ وېکټې یې اخیستي دي.
نوموړی ځوان لوبغاړی دی، چې په کیڼ لاس ارتودوکس کراره یا څوکه توپ اچونه کوي او په ښي لاس توپوهنه کوي.
وین د اسلام مبارک دین تر قبلولو وروسته خپل نوم عماد ته واړاوه او اوس د عماد په نوم یادیږي.
د سویلي افریقا د کرکټ ملي لوبډلې دې ځوان لوبغاړي په خپله انسټګرام پاڼه لیکلي، چې د روژې په مبارکه میاشت کې یې د اسلام سپیڅلی دین قبول کړ او اوس روژې هم نیسي.
ویل کیږي چې د نوموړي د دې اقدام تر شا د هغه هېواد د بل مسلمان لوبغاړي هاشم املا لاس دی چې د کرېکټ په نړۍ کې په یوه غوره مسلمان شخصیت بلل کیږي.
دا په داسې حال کې ده چې له ده وړاندې په ۲۰۱۱ کې د افریقا بل کیڼ لاسي الراونډر وېن پرنېل هم اسلام قبول کړی و او اوس مسلمان دی.
د معلوماتو له مخې، وېن پرنېل اوس ۳۱ کاله عمر لري او د افریقا لپاره یې په ټولو یو ورځنیو لوبو کې ۹۴ وېکټې اخیستي او شل اوریزو لوبو کې یې ۴۱ وېکټې ترلاسه کړي دي.