تاند ( دوشنبه، د غویی ۶) د افغانستان د کرنې اوبو لګولو او مالدارۍ وزارت چارواکي د تېر په پرتله په هېواد کې د غوزانو (چارمغز) د حاصل د ډېروالي خبر ورکوي.
له دغه وزارت څخه په خپره شوې خبرپاڼه کې راغلي چې تېر کال په ټول هېواد کې د غوزانو حاصلات ۱۴ زره او ۷۸۸ متريک ټنه وو چې د تېر په پرتله زیاتوالی ښیي.
خبرپاڼه وایي: “په تېر ۱۳۹۹ کال کې افغانستان کې ۱۴۸۷۷ ټنه غوزان تولید شوي دي. ډېر ورښت او د بزګرانو څخه د کرنې وزارت ملاتړ د دې باعث شوی چې د دې مېوې حاصلات لوړ شي.”
د معلوماتو له مخې، بدخشان د ۴۵۰۰ ټنو په تولید سره لومړی، کاپیسا د ۲۵۰۰ ټنو تولیدولو سره دویم، او پروان د ۱۵۰۰ ټنو په تولیدولو سره افغانستان کې د چهارمغزو تر ټولو لوی تولیدوونکي ولایتونونه بلل شوي دي.
د کرنې اوبو لګولو او مالداري وزارت معلومات ښیي چې کابل، نورستان، تخار، پنجشېر، کنړ، پکتيا، ميدان وردګ او دایکندي هغه ولايتونه دي چې د غوزانو د حاصل لپاره مناسبه اوبه او هوا لري.
دا په داسې حال کې ده چې غوز یا چهارمغز د افغانستان د وچو مېوو عمده قلم دی چې د ۲۸ ولایتونو پر ۵۰۰۰ هکتاره ځمکو باندې یې ونې کرل شوې دي.
د معلوماتو له مخې، د غوز ونه په داسې اقلیم کې ښه وده کوي چې په دوام داره توګه ځان یو ډول وساتي یا هم غرنیزه سیمه وي او ځمکه یې شګه ولري.