تاند ( دوشنبه، د ثور ۶مه) چین وایي خپل سوداګر او کمپنۍ دې ته هڅوي څو په افغانستان کې پانګونه وکړي.
په کابل کې د چین سفیر وانګ یو په خپلو وروستیو څرګندونو کې ویلي ، چې دوی د یو پیاوړي او پرمختللي افغانستان غوښتونکي دي.
د وانګ یو په خبره له همدې امله هڅه کوي چینايي سوداګر په افغانستان کې په بېلابېلو برخو کې پانګونې ته وهڅوي.
هغه همدا راز ویلي چې د یو کمربند یوې لارې پروژې په پلي کېدو سره به د افغانستان او چین اړیکې لا ډېرې پراخې شي او په ټوله سیمه کې به اقتصادي وده رامنځ ته کړي.
چین د افغانستان لپاره د سوداګرۍ مهم شریک ګڼل کېږي، چې تر ډېره په سوداګریزه برخه کې له افغانستان سره همکاري کوي.
بل لورته د اقتصادي چارو پوهان بیا وایي، افغانستان چې د آسیا زړه نو ځکه یې تر ډېره په وروستیو کې د چین پام ځان ته اړولی دی.
دوی له چین سره د افغانستان سوداګرېزې اړیکې ګټورې ګڼي، خو وايي هر هغه توکي چې له چین نه افغانستان ته واردېږي باید کنترول شي او همیشه تر ارزونې لاندې وي.