تاند( دوشنبه د حمل ۳۰) د ختیځ ولایت ننګرهار لپاره د وسله والو طالبانو نظامي مسؤل ملا نېک محمد چې په رهبر مشهور وو نن ناوخته د پښتونخوا په مرکز پېښور کې ووژل شو.
ویل کیږی چې له رهبر سره یې دوه نور ملګري ټپيان شوي دي.
د ننګرهار والي ضیاءالحق امرخېل په خپله فیسبوک پاڼه په یوه پوسټ کې د رهبر د مرګ د خبر په خپرولو سره نوموړی د طالبانو یو مهم نظامي قوماندان بللی دی.
ښاغلي امرخېل لیکلي، «د ننګرهار لپاره د وسله والو طالبانو يو مهم نظامي قوماندان نیک محمد رهبر رهبرمل نن مازیګر ناوخته د کوزې پښتونخوا د پيښور حاجي کیمپ سيمه کې وژل شوی او د ښاري شبکې مسؤل عزيزالله مشهور په مصطفی په ګډون يې دوه ملګري ټپيان شوي.»
ویل کیږي چې د طالبانو دغه وژل شوي قوماندان د ننګرهار ولایت د خوګياڼو او څو نورو ولسوالۍ کې د حکومت پر ضد پراخ فعالیتونه ترسره کول او د حکومت ضد پلانونه یې عملي کول.
د خوګیاڼو ولسوالۍ اوسېدونکي وایي چې دوی د رهبر له کړنو په تنګ راغلي و او وخت ناوخت یې ځورول.
د جاوېد خوګیاڼي په نوم د ننګرهار د خوګیاڼو ولسوالۍ یو اوسېدونکي له تاند سره په خبرو کې وویل، “خوګیاڼو کې مو کور وو د همده له لاسه چې اخطارونه یې راکړل پلار ته مې بمونه کېښودل اړ شو کابل ته راغلو.”
د ده په خبره چې ورته به یې ویل “ولې تاسو د حکومتي کسانو سره راشه درشه لرۍ.”
که څه هم چې داعش د یوې خبرپاڼې په خپرولو د رهبر د وژلو مسؤلیت منلی، خو یو شمېر نه تایید شوي راپورونه وایي چې د افغانستان د روغې جوړې لپاره د متحده ایالاتو ځانګړي استازي څو ورځې وړاندې د سولې په رابطه د پاکستان د ناغېړۍ له امله په دغه هېواد باندې د یو شمېر بندیزونو ګواښ کړی وو چې په مقابل کې یې پاکستان د یو شمېر سرکښو طالبانو د وژلو او زندان ته اچولو ژمنه ورکړې وه.