تاند (شنبه د حمل ۲۸ ) د افغانستان د ملي دفاع وزارت وايي، افغان ځواکونو په نیمروز ولایت کې د طالبانو له یوه زندان څخه ۲۰ سرتیري آزاد کړل.
د دفاع وزارت نن شنبه د یوې خبرپاڼې په خپرولو سره ویلي، د ملي اردو ځواکونو د نیمروز ولایت په خاشرود ولسوالۍ کې عملیات ترسره کړل چې پر مهال یې د طالبانو له یوه زندان څخه ٢٠ امنیتي سرتېري آزاد شول.
په خبرپاڼه کې راغلي چې په خوشې شویو سرتېرو کې ۱۷ د ملي اردو او درې هغه یې ملي پولیس دي.
دفاع وزارت وايي په دغو عملیاتو کې د طالبانو د یوه مهم قوماندان مولوي بشیر په ګډون ٧ طالبان هم ووژل شول.
طالبانو تر اوسه په دې هکله خپل نظر نه دی څرګند کړی.