تاند ( پنج شنبه، د حمل ۱۹) د امریکا دفاع وزارت د کندهار پر هوايي ډګر د تېرې ورځې برید وغنده.
سرچینه وایي سره له دې چې یاد برید مالي او ځاني زیان نه لري، خو د طالبانو له لوري د تاوتریخوالي زیاتوالی کولی شي د سولې لپاره رامنځته شوی فرصت له خنډ سره مخ کړي.
د کندهار هوايي ډګر کې سلګونه امریکايي او ناټو ځواکونه مېشت دي.
د امنیتي سرچینو له قوله تېره ورځ د هاوان څلور مرمۍ د احمدشاه بابا نړیوال ملکي هوايي ډګر سره نژدې او دوه نورې بیا د ۲۰۵ اتل قول اردو دننه پر یوې هواره ځمکه لګېدلي دي.
د یادونې ده، چې تېره ورځ سهار مهال د هاوان ۴ مرمۍ د کندهار ولایت مقام سره او دغه راز د جنرال عبدالرازق له قبر سره نږدې لګېدلې وې.
طالبانو هم تېره ورځ ویلي و چې د کندهار پر هوايي ډګر برید یې د بهرنیو ځواکونو له لوري په پنجوايي او ارغنداب ولسوالیو کې د هوايي بریدونو په غبرګون کې کړی دی.