تاند ( چهارشنبه، د حمل ۱۸) روغتیا پوهان وایي، هر انسان له بل انسان څخه د یخنۍ د احساس په تړاو توپیر لري چې د ځینو یې کم او ځینو بیخي ډېر ساړه کیږي.
د دوی په باور د نارینه وو په پرتله ښځې ډېرې سړېچنې وي او له نارینه وو د دوی ډېر ساړه کیږي.
روغتیا پوهان وايي، هغه انسان چې تل د یخنۍ احساس کوي، لاملونه یې ځینې ناروغۍ دي.
د وینې په جریان کې نیمګړتیا
دوی زیاتوي، د وینې جریان په بدن کې د حرارت د درجې منظمولو لپاره مهم رول لوبوي، کله چې د وینې جریان ګډوډ شي، انسان په پښو او لاسونو کې د یخنۍ ډېرېدو احساس کوي.
د روغتیا پوهانو په وینا، ډېر کله د شکرې ناروغي، د حدودي عصب د نیمګړتیا لامل ګرځي.
دوی وایي، د دې ناروغۍ نښې بې حسوالی او په پښو او لاسونو کې درد دی، دا چې زیانمن شوی عصب دماغ ته د بدن د حرارت د درجې استولو دنده لري، امکان لري د شکر ناروغي لرونکي کسان تل د یخنۍ احساس وکړي.
دوی دغه راز زیاتوي، امکان شته چې لږ خوب هم په عصبي سیسټم کې ډېرې ستونزې راوټوکوي او په دماغ کې د بدن د حرارت د درجې د ګډوډۍ لامل وګرځي.
دا په داسې حال کې ده چې د فینلنډ جیفاسکیلا پوهنتون په یوه څېړنه کې څېړونکو شل ځوانان پوره ۶۰ ساعته له خوبه محروم وساتل، پایله یې دا شوه چې د بدن د حرارت درجه یې د خوب له کبله ټیټه شوه.