تاند ( چهارشنبه، د حمل ۱۸) امنیتي سرچینې وایي، وسله والو طالبانو کندهار کې د احمدشاه بابا پر نړیوال هوايي ډګر شپږ د هاوان مرمۍ توغولي.
د سرچینو په حواله په دې پېښه کې چاته مالي او ځاني زیان نه دی اوښتی.
امنیتي سرچينې وايي، څلور مرمۍ د احمدشاه بابا نړیوال ملکي هوايي ډګر سره نژدې او دوه نورې بیا د ۲۰۵ اتل قول اردو دننه پر یوې هواره ځمکه لګېدلي دي.
د یادونې ده، چې تر دې وړاندې نن سهار څلور نورې د هاوان مرمۍ د کندهار ولایت مقام ته نژدې او د جنرال عبدالرازق له قبر سره نږدې لګېدلې وې.
وسله والو طالبانو د دې بریدونو مسولیت منلی دی.
طالبان وایي، چي دا بریدونه يې په ارغنداب ولسوالۍ کي د بهرنيو ځواکونو د هوايي بریدونو په غبرګون کې کړي دي.