تاند ( چهارشنبه، د حمل ۱۸) د ژورناليست یما سیاوش پلار وایي، د سیاوش د وژل کېدو د قضیې په اړه د حکومتي چارواکو ضد او نقیض څرګندونو ته په پام د هغه د قتل د عاملینو پر نیولو کېدو باور نه لري.
هغه ویلي، د افغانستان بانک د مسوولانو له لوري د دې پېښې په اړه د جزیاتو پټ ساتلو او د قتل په تور د امنیتي مسوولانو ضد او نقیض څرګندونو ته په پام، په دې برخه کې د حکومت پر ژمنو باور نه لري.
دا په داسې حال کې ده، چې نن د ولسمشر مرستیال امرالله صالح اعلان وکړ، چې د یما سیاوش د وژل کېدو اصلي عاملین یې نیولي دي.
امرالله صالح وايي چې امنیتي ځواکونو په کابل ښار کې د طالبانو ۱۱ کسیزه ډله نیولې ده او دا کسان د ژورنالیست یما سیاوش په ګډون د ګڼ شمیر کسانو په وژنو او چسپکي ماین چاودنو کې لاس لري.
افغان حکومت تر دې وړاندې هم د یما سیاوش په قضیه کې د ځینو کسانو د نیولو خبره کړې وه، خو د نوموړي د کورنۍ غړي وایي، چې دوی پر شوو پرمختګونو قناعت نه کوي.
د یما سیاوش کورنۍ ادعا کوي چې حکومت ددې قضیې د څېړلو په برخه کې اړینه همکاري نه ورسره کوي.
د یادونې ده چې د یما سیاووش کورنۍ څه موده وړاندې د ملګروملتونو له سازمانه غوښتي وه، چې د سیاوش د وژنې د دوسېې په ارزولو کې مداخله وکړي.
یما سیاوش د روان کال د لړم په میاشت کې له خپلو دوو همکارانو سره د یوه مقناطیسي ماین په چاودنه کې ووژل شو.
تیرکال دلړم میاشت ۱۳۹۹ آن پیړۍ هم بدله شوه – سږ پنځلسمه لمریزه پیړۍ ده .
په درنښت