تاند (چهارشنبه د حمل ۱۱) د افغانستان د ملي امنیت عمومي ریاست وايي، د خوست ولایت په صبریو، ځاځي میدان او باک ولسوالیو کې د حقاني شبکې او وسله والو طالبانو پر ضد عملیاتو کې د حقاني شبکې ۱۷ مهم کسان یې وژلي دي.
دغه ریاست نن چهارشنبه په یوه خبرپاڼه کې ویلي، دا عملیات چې د مکتب بازار،زمبر، میرشاه چینه او توده کلي کي تر سره شوي پرمهال یې د طالبانو او حقاني شبکې ګڼ شمېر جنګي مهمات هم د افغان ځواکونو لاسته ورغلي دي.
په خبرپاڼه کې راغلي، «د ملي امنیت ځانګړو ځواکونو د خوست ولایت په صبریو ولسوالۍ د ځايي خلکو په غوښتنه ځانګړي عملیات ترسره کړي، چې په پایله کې د حقاني شبکې مهم قوماندان سبیل حمیدي په ګډون ۱۷ تنه مهم غړي وژلي او ګڼ شمیر وسلې او مهمات د ملي امنیت ځواکونو ته په لاس ورغلي دي.»
سرچینه زیاتوي، طالبانو د زمبر کلینیک په سیمه کې غوښتل د یوې ښځې او ماشوم په واسطه افغان ځواکونو ته ماین ځای پر ځای کړي چې خپله یاده ښځه او ماشوم هم په ماین چاودنه کې وژل شوي دي.
د یادونې ده چې په روانه اونۍ کې طالبانو ادعا کړې وه چې د خوست ولایت په صبریو ولسوالیو کې د افغان ځواکونو په عملیاتو کې ګڼ شمېر ملکي وګړي مړه او ټپیان شوي دي، خو ملي امنیت د طالبانو دغه څرګندونې تبلیغات بللي دي.
طالبانو تر اوسه په خوست کې د خپلو جنګیالیو د وژل کېدو په هکله څه نه دي ویلي.
ملي امنیت تیره ورځ هم په پکتیکا کې د القاعده شبکې او طالبانو د مهم قوماندان د وژل کېدو خبر ورکړ.
ملي امنیت په پکتیکا کې د القاعده او طالبانو د دوو لوړ پوړو قوماندانانو د وژل کېدو خبر ورکړ