تاند(چهارشنبه، د حمل ۱۱) د بلخ پولیس وایي، دغه چاودنه نن له غرمې مخکې په کلفت بندر کې رامنځته شوه چې له کبله یې دوه ملکیان ووژل شول او ۱۶ نور ټپیان شول.
د بلخ د پولیسو ویاند عادل شاه عادل وایي، دغه پېښه نن له غرمې مخکې د بلخ ولسوالۍ په کلفت بندر کې هغه مهال رامنځته شوه چې په یوه کراچۍ کې ځای پر ځای شوي ماین چاودنه وکړه.
د نوموړي په خبره، په دې برید کې د یوه ماشوم په ګډون دوه ملکیان وژل شوي او د درېیو سرتېرو په ګډون ۱۶ نور ټپیان شوي دي.
د دغه برید مسوولیت تراوسه کومې وسلهوالې ډلې نه ده منلی.
په ورته وخت کې د تخار د علماوو شورا رییس مولوي عبدالصمد محمدي په یوه چاودنه کې خپل ژوند بایللی دی.
د تخار ولایت سیمه ییز چارواکي وایي چې نن غرمه مهال د مولوي عبدالصمد محمدي پر موټر د چسپکي ماین چاودنه شوې ده چې له امله یې نوموړی وژل شوی او درې تنه نور ټپيان شوي دي.
د چاودنې پړه تر اوسه پورې کومې ډلې پر غاړه نه ده اخیستې.
د یادونې ده چې په دې وروستیو کې د سولـې خبرې هم په ټپه ولاړې دي خو په هېواد کې د طالبانو تاوتریخوالی ورځ تر بلې زیاتېږي.