تاند ( یکشنبه، د حمل ۸ ) ولسمشر محمد اشرف غني وایي، افغانستان پرېمانه طبیعي زېرمې لري او که د یادو زېرمو مدیریت په ښه توګه ترسره شي نو هېڅ افغان به له لوږې سره مخ نه شي.
هغه نن د ځوانانو شورا د پرانیستې مراسمو کې د وینا پر مهال وویل چې د هېواد طبیعي زېرمو په مدیریت سره به د ټولو هېوادوالو اقتصادي ستونزې حل شي.
ولسمشر دغه راز زیاته کړه چې د هېواد په حکومتي ادارو کې له دولتي منابعو هیڅ ګټه نه اخیستل کېږي.
هغه له ډېرو جزیاتو ورکولو پرته وویل چې اوسمهال د هېواد لږ تر لږه ۵۰ سلنه عواید غلا کېږي.
نوموړي ځوانانو ته په خطاب کې وویل، هر هغه څوک چې تعصب او فساد کوي، ملي وحدت ته صدمه رسوي، د هغوی پر وړاندې باید پیاوړې او کارنده مبارزه وشي.
ولسمشر غني دغه راز د سولې پروسې ته په اشارې څرګنده کړه چې په تېرو ۴۲ کلونو کې د افغانستان خلک د سولې له حقه بې برخې وو او اوس باید په خپله د خپل راتلونکي نظام د جوړونې لپاره پرېکړه وکړي.
په ورته وخت کې نن په خوست ولایت کې زرګونو خلکو د نظام د بقا په موخه د جمهوریت په ملاتړ غونډه ترسره کړه او له بهرنیو ګاونډیو هېوادونو څخه یې غوښتنه وکړه څو د افغانستان د جمهوریت په چارو کې له لاسوهنو لاس په سر شي.