تاند (یک شنبه، د حمل ۸) د خوست ولایت د صبریو ولسوالۍ اوسېدونکي وايي تېره شپه په دې ولسوالۍ کې د عملیاتو پرمهال ۱۵ ملکیان وژل شوي دي.
د سیمې اوسېدونکي وايي دا عملیات حکومتي ځواکونو تېره شپه ترسره کړي.
دوی وایي په دې عملیاتو کې د دوو ښځو او یو ماشوم په ګډون ۱۵ کسان وژل شوي دي.
ځايي خلک وایي دغه راز په دې عملیاتو کې ۳ نور ماشومان هم ټپیان شوي دي.
د خوست امنیتي مسوولینو تر اوسه په دې اړه څه نه دي ویلي.
دغه راز د یوه بل خبر له مخې د خوست په ښار کې په موټر سایکل بم چاودنه شوې.
د خوست امنیه قوماندانۍ مسوولان وایي چې دغه موټر سایکل بم چاودنه شېبه وړاندې مجاهد څلور لارې کې هغه مهال وشوه کله چې امنیتي ځواکونه له سیمې تېریدل.
د امنیه قومندانۍ ویاند قدرت الله حیدرخېل وايي، چاودنه کې درې د ملي امنیت سرتېري او پنځه ملکیان ټپيان شوي دي.
د دې چاودنې مسوولیت تر اوسه چا نه دی منلی.