تاند (شنبه، د حمل ۷) مصر کې د دوو اورګاډو په ټکر کې ۳۲ تنه مړه شوي او شاوخوا ۹۱ نور ژوبل دي.
دا پېښه پرون د مصر د نیل سمندر ته نږدې د تحته په ښار کې شوې ده.
د مصر حکومت د پېښې په اړه د څېړنو امر کړی دی.
د یاد هېواد ولسمشر عبدالفتاح السیسي پر خپله فیسبوک پاڼه د دغې پېښې په اړه خواشیني ښودلې او ویلي چې د پېښې عاملینو ته به سزا ورکړل شي.
بل لورته بیا د مصر دولتي ټلویزون وايي چې ولسمشر السیسي صدر اعظم او د عامې روغتیا وزیرانو ته ویلي، چې د پېښې ځای ته ورشي او حالت په خپلو سترګو وویني او وڅېړي.
د مصر د عامې روغتیا وزارت یو ویاند ویلي دي چې لږ تر لږه ۹۱ ټپيان روغتونونو ته لېږدول شوي او ۳۲ تنه مړه شوي.
خو رویټرز بیا د مصر د روغتیایي چارواکو له قوله لیکلي د دې هېواد د سوهاج په اړوند سیمه کې دوه مسافر وړونکي اورګاډي ټکر شوي چې له امله یې ۳۲ کسان مړه او ۱۶۵ نور ژوبل شوي دي.
دغه راز د یوه بل خبر له مخې بیا په میانمار کې د فعالانو یوه ډله وايي چې د پوځي کودتا پر ضد د لاریونونو پر مهال د وژل شویو کسانو شمېر له ۳۰۰ واوښت.
له سیاسي بندیانو سره د مرستې ټولنې چې د وروستیو اعتراضونو په ترڅ کې د مړینو او توقیفونو جزئیات ثبتوي ویلي، چې د ۳۲۰ کسانو وژل کېدل یې ثبت کړي، خو دا ټولنه وايي چې دا یوازې له دوی سره د ثبت شویو کسانو شمېره ده.
د فعالانو د دې ټولنې په وینا د تلفاتو اصلي شمېر ښايي تر دې زیات وي.
په برما کې د فبرورۍ د لومړۍ نېټې له کودتا وروسته چې په نتیجه کې یې د د انګ سان سوچي په مشرۍ حکومت وپرځېد تر اوسه پورې د برما په پلازمېنه او نورو ښارونو کې د پوځي واکمنۍ پر ضد لاریونونه روان دي.