تاند ( چهارشنبه، د حمل ۴) افغان ولسمشر محمد اشرف غني نن په یوه رسمي سفر د کمال خان بند پرانیستې لپاره نیمروز ولایت ته لاړ .
د رسنیو د راپورنو له مخې ولسمشر غني به په څو شېبو کې دا بند، چې د نیمروز په چاربورجک ولسوالۍ کې جوړ شوی پرانیزي.
د اوبو د چارو د تنظیم د ملي ادارې ویاند نظام الدین خپلواک تاند وېب پاڼې سره په خبرو کې ویلي، په پام کې ده چې د کمال خان بند د ولسمشر په ګډون د ځانګړو مراسمو په ترڅ کې په څو شېبو کې پرانېستل شي.
خپلواک زیاتوي دا بند به د وري په څلورمه نېټه نن د چهارشنبې په ورځ پرانیستل کېږي.
هغه وایي د دې بند په وسیله به د نیمروز دښتې زرغونې او لکونه هېوادوالو ته به د کار زمینه برابره شي.
د اوبو د تنظیم ملي اداره وایي، کمال خان بند د ۵۲ میلیون مکعب متر اوبو د زېرمه کولو او د یولک او ۷۴ زره هکتاره ځمکې د خړوبولو وړتیا لري.
یاده اداره زیاتوي، دغه راز کمال خان بند د ۹ مېګا واټه برېښنا تولید ظرفیت هم لري.
له ولسمشر څخه مننه چه دا تاریخی ویاړ یی خپل کړ الله دده دا کار په صدقه جاریه کی حساب کړی. ټولو افغانانو ته مبارک ویی .