تاند ( سه شنبه، د حمل ۳) کندهار کې د ملکي وګړو پر کورونو د هاوان مرمۍ لګېدو پېښه کې اوو کسانو ته مرګ ژوبله اوښتې ده
یو شمېر سرچینې وايي، تېره شپه د کندهار ارغنداب ولسوالۍ په مناره سیمه کې د ملکي وګړو پر کورونو د هاوان مرمۍ لګېدلي، چې له امله یې دوه کسان وژل شوي او د یوې ښځې په ګډون پنځه کسان ټپيان شوي دي.
تر اوسه معلومه نه ده چې د هاوان دغه مرمۍ د حکومتي ځواکونو او که د طالبانو له لورې توغول شوي.
په ورته وخت کې یوه امنیتي سرچینه بیا وایي، چې د یادې ولسوالۍ په مناره سیمه کي پر ملکي سیمو د افغان ځواکونو پر دوه توغول شویو هاوانونو کې ۹ کسانو ته مرګ و ژوبله اوښتې ده.
سرچینې زیاته کړې دا مرمۍ د استوګنې په دوه کورونولګېدلي، دوه کسان یې وژلي او د ښځو او ماشومانو په ګډون یې ۷ نور ټپیان کړي دي.
د کندهار ولایتي مسوولانو او وسله والو طالبانو تر دې دمه په دې اړه څه نه دي ویلي.