تاند ( سې شنبه، د حمل ۳ ) طبي پوهان وایي، د ښځې او خاوند تر منځ سمې او روغې اړیکې د خوشاله ژوند راز دی؛ خو که دا اړیکې سمې ونه اوسي، د وینې د فشار تر څنګ، د ډېرو روغتیايي ستونزو لامل کیږي.
د امریکا د مېشګان پوهنتون طب پوهانو په یوه تازه څیړنه کې موندلي، هغه میړونه او ښځې چې یو له بل سره سمې اړیکې نه لري، پر اروايي ستونزو سربېره، د وینې پر لوړ فشار هم اخته کیدای شي.
څیړنه کې راغلي چې نارینه نسبت خپلې مېرمنې ته ژر پر یادو ناروغیو اخته کیدلای شي.
دوی دا دلیل راوړي، چې نارینه د ښځو پر وړاندې حساس وي.
ژور خفګان، د زړه ناروغۍ او ځینې نور هم د مېرمنې او خاوند له ناسمو اړیکو څخه سرچینه اخلي. خو اوس پوښتنه دا ده چې څنګه دا اړیکې ښې وساتو؟
له میړه/مېرمنې څخه له کچې زیاته تمه مه کوئ. دا چاره اړیکې زیانمنوي.
د تفاهم نشتون هم اړیکې خرابوي. کوښښ وکړئ چې یو او بل درک کړئ.
که غواړی خوشاله او سالمې اړیکې ولری، نو سوله وکړئ او یو بل ته سره تېر شئ.