تاند(چهارشنبه، د حوت ۲۷) د پاکستان لومړي وزیر عمران خان ویلي چې هیله لري افغانستان ژر تر ژره سولې ته ورسېږي.
د نوموړي په وینا، خوښ دی چې پاکستان د افغان سولې برخه کې خپل رول ادا کړی دی او په دغه هېواد کې د جګړې ختمولو لپاره د دوی هڅو تر اوسه پورې ښه پایله ورکړې ده.
عمران خان زیاته کړې، افغانستان کې نا امنیو د دواړو هېوادونو اړیکې ډېرې سړې کړې خو په خبره یې د افغان سولې لپاره دوی کوټلي ګامونه پورته کړي دي او هڅه یې کړې چې نور باید د افغانستان جګړه پای ته ورسول شي.
نوموړي همدا راز ویلي، نور په افغانستان کې د جګړې دوام نه دی په کار او په دغه هېواد کې روانه جګړه باید د خبرو اترو له لارې ختمه شي.
عمران خان زیاتوي، که څه هم افغان دولت او امریکا فکر کوي چې طالبان د پاکستان په لاس کې دي خو د ده په وینا دوی پر طالبانو دومره نفوذ نه لري چې خپلې پرېکړې ورباندې ومني.
د یادونې ده چې پاکستان له دې وړاندې هم څو ځله د افغان سولې له پروسې ملاتړ کړی او هر وخت یې ژمنه کړې چې نور به د طالبانو ملاتړ نه کوي خو له هر ځل ژمنو سره ـ سره یې ځان افغانستان او نړیوالو ته بې باوره کړی دی.