تاند ( چهارشنبه، د کب ۲۷) د کلیو او بیا رغونې وزارت چارواکي وایي، هېواد کې یې د بې کارۍ کچې د کابو کولو په موخه یو نوی پروګرام چمتو کړی دی.
د دغه وزارت چارواکي زیاتوي چې د یاد پروګرام له لارې به شاوخوا ١،١ میلیونه وچکالي ځپلي کسان په کار بوخت شي.
د کلیو او بیا رغونې وزارت ویاند محمد رفیق جنبش وایي، دا نوی پروګرام د نړیوال بانک له لوري د ۲۰۰ میلیونه ډالرو په ارزښت پلی کیږي.
د نوړي د معلوماتو له مخې، د انعطاف په نوم دغه لویه پروژه به د روان ۱۴۰۰ کال د ثور په میاشت کې پیل شي.
جنبش دغه راز زیاتوي چې د دې پروژې له لارې به وچکالۍ ځپلو ۸۵ زرو کسانو سره نغدي مرستې وشي او نږدې یو عشاریه یو میلیون کسانو ته به کاري زمینې هم برابرې شي.
د کلیو بیارغونې او پراختیا وزارت د معلوماتو پر بنسټ، دغه پروګرام به د هېواد په ۱۵ ولایتونو (بدخشان، بادغیس، بامیان، غزني، دایکنډي، غور، جوزجان، کندهار، لغمان، نورستان، پکتیا، سمنګان، سرپل، ارزګان، زابل) کې پلی شي.
دا وزارت زیاتوي چې د یاد پروګرام په لړ کې به ۷۸ ولسوالۍ او ۷۳۱۶ شوراګانې به تر پوښښ لاندې ونیول شي.
دا په داسې حال کې ده چې دې وروستیو کې د کرونا ناروغۍ سربېره نا امنیو او تاوتریخوالي د خلکو په روزګار ژور اثر کړی او ډیری خلک د کارو بار له نشتوالي سر ټکوي.