تاند ( سه شنبه، د حوت ۲۶) د افغانستان او زمبابوې کرکټ ملي لوبډلو ترمنځ د شل اوریزه لوبو لړۍ سبا چهارشنبه پيلېږي.
له دې وړاندې دواړو لوبډلو د ټېسټ لوبو لړۍ ترسره کړه چې لومړی یې زمبابوې او دوهمه یې بیا افغانستان وګټله.
دا درې شل اوریزه لوبې چې د ابوظهبۍ په شېخ زېد کرکټ لوبغالي کې پيلېږي، سبا یې لومړنۍ لوبه ده، چې د افغانستان په وخت به ٢:٣٠ بجې پيل شي.
افغانستان دوه ورځې وړاندې دې لوبو ته ١٥ کسيزه لوبډل اعلان کړه.
تېره ورځ يې پکې پنځه نور لوبغاړي هم ورزيات کړل او ټول ٢٠ کسيزه سکواډ شو.
افغانستان او زمبابوې په ٢٠١٩ کال کې دوه نړيوالې شل اوريزې لوبې ترسره کړې وې، چې په يوه لوبه کې افغانستان د ٢٨ منډو په توپير بريا خپله کړې وه او په بله لوبه کې زمبابوې د ٧ ويکټو په توپير بريا خپله کړې وه.