تاند(سه شنبه، د حوت ۲۶) په بغلان کې د پوهنتون د استادانو په موټر برید کې اتو تنو ته مرګ ژوبله اوښتې ده.
د راپورونو په وینا، دغه پېښه نن سهار هغه مهال شوې چې د بغلان پوهنتون د کرنې پوهنځي یو شمېر استادان د حملې په موټر کې د دندې پر لور روان وو.
په دغه برید کې دوه کسه وژل شوي او شپږ نور ټپیان دي.
امنیتي سرچینو رسنیو ته ویلي چې د استادانو پر موټر د په پلخمري ښار کې د راکټ برید شوی.
د لومړنیو راپورونو له مخې په وژل شوو کې یو موټر چلوونکی او محصل شامل دي او ټپیان یې د پوهنتون استادان دي.
تر اوسه د برید مسوولیت هېڅ ډلې نه دی منلی.
دا پیښه داسې مهال رامنځته کېږي چې تېره ورځ په کابل کې یوې چاودنې د یوې درې کلنې ماشومې او د هغې د مور په ګډون څلور کسه ووژل او ۱۶ نور یې ټپیان کړل.
دغه چاودنه تېره ورځ د پوهنې وزارت، مخابراتو وزارت او اطلاعاتو او فرهنګ وزارت د ملکي کارکوونکو پر یوه ګډ کاسټر ډوله موټر شوې ده.