تاند ( چهارشنبه، د حوت ۱۳) د ولسمشر د ملي امنیت سلاکار حمد الله محب ویلي چې د دوی لومړنی هدف سوله ده او وړاندې تر دې چې د سولې د ټینګښت تضمین نه وي ورکړل شوی، هره طرحه به بې ګټې وي.
محب ټینګار کړی چې دوی د طرحې تر مطرح کولو وړاندې له طالبانو او نړیوالې ټولنې څخه د سولې د ټینګښت ضمانتونه غواړي.
نوموړی دا څرګندونې وروسته تر هغه کوي چې په دې وروستیو کې د امریکا د بهرنیو چارو وزارت د یو لوړپوړي چارواکي له خولې داسې راپورونه ورکړل شوي چې ګوندې زلمي خلیلزاد په کابل کې له افغان چارواکو سره لیدنه کې د انتقالي حکومت طرحه وړاندې کړې او د ملګري ملتونو په منځګړیتوب یې د یوې پراخ بنسټه ناستې خبره کړې ده.
د یادونې ده چې ویل کېږي خلیلزاد به سبا دوحې ته لاړ شي او هلته به له طالب پلاوي سره هم پر همدې طرحه خبرې اترې ولري.
بل لورته د افغانستان د سولې د مسایلو او سیاسي وضعیت څارونکي وایي چې خلیلزاد دا ځل د تېر په پرتله له سخت ماموریت سره مخ دی.
د سیاسي چارو شنونکی او خبریال سمیع یوسفزی وایي خلیلزاد هڅه کوي چې طالبان یا اوربند ته راضي کړي او یا د سرتېرو د حضور دوام ورباندې ومني.
نوموړی زیاتوي چې طالبان به دا دواړه انتخابه و نه مني، نو له همدې امله د خلیلزاد ماموریت خورا سخت دی.