تاند (دوشنبه د حوت ۱۱) د افغانستان د کورنیو چارو وزارت وايي، هغه پنځه امنیتي منسوبان يې له دندو لرې کړل چې د ددې وزارت د قراول سرتېري ګواښلي او يو يې ډبولی و.
د کورنیو چارو وزارت ویاند طارق آرین وايي، دغو پنځو کسانو تېره ورځ ددې وزارت امنیتي ساتونکو ته ګواښ کړی و او یو يې وهلی و، له دندو ګوښه شول.
د ښاغلي ارین په خبره، د کورنیو چارو وزارت امنیتي مرستيال عبدالصبور قانع د يادې موضوع له خبرېدو وروسته دغه پنځه امنیتي منسوبان له دندې ګوښه او د نورو څېړنو په موخه يې د ياد وزارت د داخلي امنیت عمومي ریاست ته معرفي کړل.
طارق آرین د کورنیو چارو وزارت د امنيتي مرستيال له قوله وايي، له استثنا پرته ټول پولیس افسران قانون ته مسؤل دي.