تاند(یکشنبه، د حوت۱۰) پاکستاني رسنیو افشا کړه چې نامعلومو وسله والو پرون (شنبه) په پېښور کې د طالبانو یو ځانبولی والي وژلی دی.
د ډیلي ټایمز ورځپاڼې پر اساس طالبان وايي، دا په وروستیو ۵ اوونیو کې دوهم مهم طالب مشر دی چې په پاکستان کې وژل کېږي.
د راپور له مخې، د لغمان لپاره د طالبانو پر والي عبدالهادي پشه يي وال د پېښور په بخشي پُل سیمه کې حمله وشوه.
پشه يي وال له مردان څخه خپل کور ته روان و چې برید پرې وشو. طالبان وايي چې نوموړی د فاتحې لپاره د خپلوانو کور ته تللی و.
حمله کوونکي په تېښته بریالي شوي او کومې ډلې د دې برید مسوولیت په غاړه نه دی اخیستی.
خو طالب مشران وايي چې ممکن داعش ډله په دې حمله کې لاس ولري.
تر دې وړاندې د طالبانو قوماندان عبدالصمد (ملا تور) د جنورۍ په لومړیو کې په پېښور کې هغه مهال ووژل شو چې له فاتحې وروسته له یوه جومات څخه راووت.
ډیلي ټایمز وايي، د طالبانو ګڼ شمېر مشران په وروستیو کلونو کې د پاکستان په بېلابېلو سیمو کې وژل شوي دي.
د ۲۰۱۷ په اپریل کې نامعلومو وسله والو پېښور ته نژدې د طالبانو یو مشر وواژه. د ۲۰۱۵ په جون کې یې د نورستان لپاره د دې ډلې ځانبولی والي مولوي میراحمد ګل هاشمي وواژه. همداراز مولوي عبدالرقیب، چې د سولې پلوي یې کوله د ۲۰۱۴ په فبرورۍ کې ووژل شو. په ۲۰۱۳ کې د سراج الدین حقاني ورور نصرالدین حقاني ووژل شو.
د طالبانو موسس او لومړنی مشر ملامحمد عمر اخوند هم په پاکستان کې په نامعلوم علت مړ شو. د دې ډلې دوهم مشر ملا اختر محمد منصور هم په بلوچستان کې ووژل شو.