تاند ( دوشنبه، د حوت ۴) د نیوزیلینډ او اسټرالیا کرکټ ملي لوبډلو تر منځ د نیوزیلینډ په کوربتوب د پنځو شل اوريزو سیالیو لړۍ نن د فبرورۍ په ۲۲مه نېټه پیل شوه.
د دې لړۍ د پيل سره سم نیوزیلینډ په لومړۍ شل اوره لوبه کې د ۵۳ منډو په توپیر آسټرالیا ته ماتې ورکړه.
په دغه لوبه کې نیوزیلينډ لومړی توپ وهنه وکړه ااو د ۵ لوبغاړو په سوځېدو يې په پوره شل اورونو کې ۱۸۴ منډې جوړې کړې.
د نیوزیلینډ لپاره ډیون کنوای۹۹ منډې ترسره کړې.
آسټرالیا لپاره ډینيل سمس، ریچارډسن دوه ، دوه او سټونیس یو لوبغاړی وسوځوه.
آسټراليا د نیوزیلیند د ۱۸۴ منډو د هدف د پوره کولو په موخه ډېر کمزوری پيل وکړ.
یادې لوبډلې د ټولو لوبغاړو په سوځېدو یواځې ۱۳۱ منډې جوړې کړې .
د اسټرالیا لپاره په توپ وهنه کې یوازې مچل مارش تر نورو زیاتې ۴۵ منډې جوړې کړې خو خپله لوبډله يې بریا ته ونه شوه رسولی.
د نیوزيلینډ له لوري بیا ټیم سوتي، ټرین بولډ دوه دوه او ایش سوډي د ۲۸ منډو په بدل کې څلور لوبغاړي وسوځول.
د یادونې ده چې د دواړو لوبډلو تر منځ به دوهمه شل اوريزه لوبه د همدې فبرورۍ میاشتې په ۲۵مه درېیمه شل اوریزه يې د راتلونکې مارچ میاشتې په دریمه، څلورمه يې د مارچ په پنځمه او وروستۍ هغه يې بیا د مارچ میاشتې په اوومه نېټه ترسره کیږي.