تاند ( دوشنبه، د حوت ۴) په قطر کې د طالبانو د سیاسي دفتر ویاند نعیم وردک په یوه ټویټ پیغام کې ویلي چې نن ماښام د بين الافغاني مذاکراتو د دواړو هيئوتونو د مشرانو او ځينو غړيو تر منځ په ښه فضاء كې ناسته تر سره شوه.
نوموړي زیاته کړې په دې غونډه کې د مذاکراتو پر دوام ټينګار وشو.
د نعیم په وینا دغه راز په دې ناسته کې د اجنډا د موضوعاتو د ترتيب لپاره ټاکل شويو ګروپونو ته دنده وسپارل شوه چې په دې اړه خپلو ناستو ته دوام ور کړي.
په ورته مهال د افغانستان د سولې په چارو کې د دولت وزارت هم د دې خبر پخلی کړی.
یاد وزارت ویلي چې نن ماښام د بین الافغاني مذاکراتو دواړو پلاویو د مشرانو او ځینو غړیو تر منځ په ناسته کې د مذاکراتو پر دوام ټینګار وشو او دغه راز د اجنډا موضوعاتو د ترتیب لپاره ټاکل شویو ګروپونو ته دنده وسپارل شوه چې په دې اړه خپلو ناستو ته دوام ورکړي.
د یادونې ده چې له شاوخوا یوې میاشتې راهیسې د افغان او طالب پلاوو ترمنځ د قطر په دوحه کې د سولې بین الافغاني خبرې ځنډېدلې وې.
په ټولنیزو رسنیو کې هم عامو افغانانو نننۍ ناستې ته هیله مندي ښودلې.
دوی له دواړو لوریو غوښتنه کړې چې د سولې د خپرو پر دوام دې لومړی اوربند وکړي څو روانه جګړه بنده شي.